Acts 4

1A NI ara padapadaki on aramas akan, samero kan, o saumas en im en kaudok, o sadusar akai, ap pokon don ira; 2Pwe re makaraki ara kawewe on aramas akan o ar padapadaki, me Iesus pan kotin kaiasada me melar akan. 3Irail ap kol ira di o kila ira nan imaten lao manda, pwe a wasa ponier. 4A me toto, me ian ronadar masan o, posonlar; ari, toto en ol akan impan limekid. 5A mandan ran o saumas, o monsap, o saunkawewe kan pokon pene nan Ierusalem. 6A samero lapalap Anas, o Kaipas, o Ioanes, o Aleksander, o karos, me kisan kainok en samoro lapalap, 7Irail pwiliki ira di nan pun arail, ap kainoma re ’ra: Ni kel en is, de ni mar en is, me komail wiaki met? 8Petrus me dir en Nen saraui ap masani on irail: Main ko, saumas en wei o monsap en Israel komail, 9Ma se pan pakadeikada, o komail kainoma re at ran wet, pweki dok man on aramas somau men, o da me a kelaile kida, 10Komail o aramas en Israel karos en mani, me mar en lesus Kristus men Nasaret, me komail kalopuelar, me Kot kotin kaiasadar san ren me melar akan, nan i eta, me men et uki o kelail kidar. 11I takai o, me lokidokila ren komail sause kan, me id wiala takai en pukakaim. 12O sota amen, me maur mi re a, pwe pil sota eu mar pan lan, me pakadara don aramas, me kitail pan maur kida. 13A ni ar kilekilaner en Petrus I Ioanes ara pereperen o so masak, rap puriamui kila, pwe re asaer, me ira aramas mal me sota ian skul, o sota non audaud, rap asaer, me ira ianer lesus. 14A ni ar kilaner aramas o, me kelailadar, uda imp ara, rap sasalar lokaia. 15Irail lao kadar ira san nan kapun, re ap kapukapun pena indada: 16Da me kitail en wiai on aramas pukat, pwe toun Ierusalem asaer, me ira wiadar kilel sansal eu, a kitail sota kak kalikama. 17A pwe ede loloksili nan pun en aramas akan, kitail en padik inapwi ira di, me ira de padaki on aramas amen ni mar wet. 18Irail lao eker ira do re ap inapwiedi me ira der pan padaki de kawewe ni mar en lesus. 19A Petrus o Ioanes sapen masani on irail: Iaduen, me pun pan kupur en Kot, sen pwili san komail mon Kot? Pein komail kasaui! l. 20Pwe se so kak so katitiki, me se kilaner o ronadar. 21Irail ap kainapwi ira di kalaudela, re ap kadar ira la, pwe sota me re diaradar, me ira en kamekameki, pweki aramas akan, pwe karos, kapina Kot, duen me wiauier. 22Pwe aramas o, me manaman en kakelada wiaui on, daulier saunpar paeisok. 23Ira lao lapwadar, ap kola ren ian ara ko, kaireki meakan, me samero lapalap o saumas akan katiti on ira. 24A irail lao ronadar, rap wiaki eu potoan on Kot: Main ir me Kot, me kotin kapikadar lan o sappa, o madau o audepa ’ra karos. 25Ir me kotin masani ren Dawid, sapwilim ar ladu: Da me men liki kan linaranaraki, o da me wei kan lamelameki me mal akan? 26O nanmarki en sappa kan kanudier o saumas akan pokon pena, en palian Kaun o sapwilim a Kristus. 27Pwe melel nan kanim wet irail karos pokon penaer, iet akan: Erodes, o Pontius Pilatus, ianaki men liki kan, o men Israel akan pwen palian sapwilim ar ladu saraui Iesus, me re kotin keiedier, 28Pwen kapwaiada meakan, me lim ar o kupur ar kileledier, en wiaui. 29Ari Main, re kotin mani arail linaranar, kotiki on sapwilim ar ladu kan, en kaloki ar masan ni peren. 30O kotin kapa wei lim ar, pwen kakelada, o kilel, o manaman akan en wiauiki mar en sapwilim ar ladu saraui Iesus. 31Ar kapakap apton nikier, wasa me re kot pena ia, ap mokimokid. Irail karos ap direkila Nen saraui, ap padapadaki masan en Kot ni pereperen. 32A monion o nen en ir karos me posonlar, kin lamalam ta pot, o sota me indada duen ar kapwa: Ai met, pwe re aneki pena kapwa takis. 33A wanporon akan me kelail ni arail kadede me Kaun Iesus kotin iasadar, a mak lapalap ian irail karos. 34O solar amen irail, me so a tunol, pwe karos, me sap de im arail mia, ap netikilar o wado pwain en me netilar akan. 35O pwilikidi ni aluwilu en wanporon akan, o nek on amen amen duen ar samama. 36A Ioses me wanporon akan ki on mar a Parnapas, (iet wewe: Nain kapol), kadaudok en Lewi amen, men Sipern, 37Me sap we mia, ap netikilar o wado pwain a, pwilikidi ni aluwilu en wanporon akan.